上堂玩麵粉 (薯仔中種)

薯仔中種包

用薯仔、高筋粉、水、酵母做種，然後每隔三日再用薯仔、高筋粉、水餵養，雪櫃內長期存放一個大密實盒，還要不時注意份量，太多的話要麼分成兩盒，要換再換大盒，有點像天酵需要持續餵養，但相對較易控制及省時。

 豬仔包外脆內軟

 全麥棍比豬仔包更脆及香

 用薯種做的Focaccia外脆內軟，比上次直接法的好食好多。

上堂玩麵粉 (手搓班 4)

今次學左整朱古力榛子包、芝士包，朱古力榛子包好甜，兩款造型睇落都唔難，但要整得好睇就唔係咁易.....哈哈
芝士包就好正，係上堂學咁多款包包中，事後整得最多最密GE一款，原食譜係用湯種，我只係用直接法黎整，但放兩日後再食依然咁鬆軟好味，一盤六個真係唔多夠喉。

基礎手搓麵包班﹕
第一堂﹕沙律香腸芝士，椰蓉卷
第二堂﹕北海道包，栗米吞拿魚
第三堂﹕意大利香草扁包，紫薯包
第四堂﹕朱古力榛子包，芝士包 

上堂玩麵粉 (手搓班 3)

今次遲到5分鐘，返到去已經見同學仔同麵粉搏鬥緊，拿拿淋拿圍裙準備加入， 先發現枱面乜粉都冇，原來今堂兩人一組，各搓一個麵糰，一甜一鹹ge。

第一舊由同學仔搓的麵糰，用黎整紫薯包，加左老麵ge，餡料係紫薯、糖、牛油。
造型方面我真係麻麻地，明明係兩頭尖的番薯包，比我搞到好似55咁款....><"

第二舊麵糰揉好麵後都唔駛點甩打，廿零下就可以停.....都未發泄完就要收手。
呢個focaccia又真係幾簡單喎，可以多d整。

基礎手搓麵包班﹕
第一堂﹕沙律香腸芝士，椰蓉卷
第二堂﹕北海道包，栗米吞拿魚
第三堂﹕意大利香草扁包，紫薯包
第四堂﹕朱古力榛子包，芝士包

全麥包 (流淚粉 - 中種法)

琴日既然試玩流淚粉，又點會只整patpat包咁少呢，緊係整多份麥包比老公啦，
照舊 1/3 全麥粉 用中種法 整，雖然冇patpat包咁軟熟，但一樣好鬆軟，可以繼續整比老公食。

ps.  屋企有四款高筋粉，要盡快消滅哂佢地至得.....哈哈　

法國T65 用黎整法棍零舍好味，比用其他粉香好多
台灣 水手牌 樓下超市就有得賣，勝在方便。
韓粉就感覺比水手粉快少少起筋，價錢就差唔多，性價比OK高。
流淚粉 貪得意買GE，成品超軟熟，鍾意食方包的一定要試下。

海蒂的白麵包 (流淚粉 - 直接法)

早輪買左包流淚粉，但一直都係整法棍，加上又聽聞呢隻粉麥香味麻麻，所以一直冇興趣掂佢，當日係因為鍾意食方包先買佢ge，但屋企太多玩具，短期內唔會買任何模具，所以呢.....當普通高筋粉用左佢算喇。

用左直接法整呢款白麵包，記得幾個月前第一次整呢款包係失敗收場，因為當然都完全唔識，只係用麵包機整，結果麵包焗完仲有陣酵母味，今次全人手揉麵，成品真係正好多，尤其係用左流淚粉，成個包都好似方包咁超軟熟。

用流淚粉整包一定要留意水份，平時留低20~30ml慢慢落，今次要留1/3先得，揉麵時已經覺得麵糰超柔軟，比用普通高筋粉軟好多。麵粉的香味的確差dd，平時焗包會全屋香哂，今次只係聞到牛油香......

材料﹕直徑10cm的麵包 6個
高筋粉   250g
奶           200g
糖           10g
鹽           1/2 茶匙
酵母       3g
無鹽牛油    10g

烤焗﹕140度 15分鐘

呢個patpat包 係咪成個大屁股咁呢~~哈哈

麥包 (中種法)

返到屋企都差唔多七點，雪櫃乜種都冇，所以就整左普通中種麥包，上過堂學返啱甩打麵糰的手勢後，而家的麵包都比以前好食，放涼後忍唔住食左兩個，好滿足。

中種麵糰﹕室溫放約1.5小時至2倍大
高筋粉   250g
奶           150g
酵母       1/2 茶匙

主麵糰﹕
全麥粉   120g
奶           15~20g
糖           20g
鹽           1/4 茶匙
蛋           1 隻
欖油       20g

烤焗﹕200度  10分鐘，轉方向後175度10分鐘。

上堂玩麵粉 (手搓班 2)

發覺呢位導師真係交足功課，上左兩堂就教左五款包包的造型，除左最基本的直接法外，湯種都有示範點整，始終係基礎班，一人煮一份都幾花時間，又要放涼先用得，3個半鐘實唔夠時間做。上堂氣氛又好，大家冇大冇細咁有講有笑~~~哈哈

第二堂又係整左三款包﹕用湯種法整 北海道包、栗米吞拿魚包，同埋私人醒ge煙肉沙律條。
導師示範左整湯種、北海道包面、吉士餡。

不過我本身唔多鍾意食湯種包，唔鍾意吞拿魚、唔鍾意甜包，我只鍾意鹹方包果種質感ge包包，
所以睇示範時都係企後面，留返前排位比其他想學的同學啦~~~
到自己包餡、整型時，又偷工減料，仲包少兩個.....欖型ge就齋包加左少少芝士裝飾。
如果一早知果兩條包係煙肉條，我就整多兩條啦....

基礎手搓麵包班﹕
第一堂﹕沙律香腸芝士，椰蓉卷
第二堂﹕北海道包，栗米吞拿魚 
第三堂﹕意大利香草扁包，紫薯包  
第四堂﹕朱古力榛子包，芝士包

上堂玩麵粉 (手搓班 1)

近幾個月都係用老麵整法棍、黑麥棍，基本上都入到口，所以都冇乜整其他包，雖然整左一段時間，但都知道自己手勢係錯ge，始於都想出去學返啱d手勢。

近排見得閒就報左個基礎手搓麵包班，都係整d唔多鍾意食或平時唔會食ge包，不過報呢個班主要係學返d手勢，所以都好期待ge。

第一堂整左三款包﹕直接法  - 提子包、沙律香腸芝士包，椰蓉卷
學返好d手勢後，除左摔打麵糰唔多順手外，整體上都ok，仲整到幾靚仔ge手套膜出黎。
試食後發現三款包質感都唔同，冇諗到同一舊麵糰只係造型、配料 唔同，焗出黎會有明顯分別，忍唔住講左句 "典解ge"~~~哈哈

基礎手搓麵包班﹕
第一堂﹕沙律香腸芝士，椰蓉卷
第二堂﹕北海道，栗米吞拿魚 
第三堂﹕意大利香草扁包，紫薯包  
第四堂﹕朱古力榛子包，芝士包

無糖包

友人整無糖包失敗，我又手多多試下整先。

只要有麵粉、水、鹽、酵粉 四種材料就可以整到麵包，無糖係可以的‧
但無糖版發酵時間需要長好多，同之前份量做法一樣，
早兩日用半份整3個包，因為趕住出門，整型後發酵1.5小時就開始焗，結果變左石頭包。

呢次用半份整4個包，整型後發酵3小時，單個的份量少左，但體積比之前的大dd。

雖然尚算入得口，但都係有糖版好食d，無糖版就留比老公慢慢嘆啦。

壓扁先

放手還原

免揉黑糖裸麥包

最近轉玩免揉包，感覺良好。

依舊按之前的份量，以及用冷藏中種法。
主麵糰材料和中種均勻配合，便用膠包好，室溫放半小時後便 移入雪櫃繼續發酵。
待膠袋脹大到幾乎要爆的時候便完成，

黑糖裸麥包

買唔到全麥粉，買左黑裸麥粉，順手執多包雜糧，其他材料份量跟之前的麥包一樣，照舊整麥包比老公。


昨天時間控制得唔好，老點個妹整戚風蛋糕後，自己再整麥包，結果麥包整型後就趕着出門，唯有放入雪櫃減慢發酵速度，5小時後返歸第一時間開雪櫃，沒有過度發酵，最出回溫半小時後，6個包包剛好擠滿烤盤，好飽滿。

奶茶戚風

個妹耐唔耐就叫我整蛋糕同布甸，我基本上都係話雪櫃冇位推鬼左佢。
雖然雪櫃常滿係真ge，但懶先係主要原因，年頭買左盒總統cream，居然放到過哂期都未的起心機整蛋糕......

琴日個妹又叫我整戚風蛋糕，其實叫左一排.....:P
今日得閒咪同佢玩下囉，計落都就快成年冇整蛋糕喇。
以前都係整海綿蛋糕多，未整過戚風，網上搵食譜跟住整，原來步驟唔多，都幾簡單。
蛋糕的質感都唔同，基本上一試就愛上左，8吋蛋糕我吃左半個，好滿足~~~

另外，Carol的食譜本身已經係少甜的，但我食得好淡口，所以蛋白霜部份 只加 30g糖，其他份量不變。
減糖後甜度剛剛好，本來留左半個聽日食，結果半夜同老公清哂。

食譜﹕http://caroleasylife.blogspot.com/2008/07/blog-post_30.html

父親節又煮飯仔

呢餐9人份，計埋涼拌小食共10道菜，梅汁蕃茄提早一晚整好，雲耳都處理好只差調味，今日下午再慢慢搞其他野，洗洗切切搞左我四五個鐘，夜晚半個鐘極速煮好餐飯。

半個鐘搞掂餐飯，查實係涼拌同蒸野多，簡單黎講就係出貓....哈哈

是日晚餐﹕粉葛鯪魚排骨湯、冰鎮青瓜西芹、涼拌雲耳、梅汁蕃茄、 豉油雞、美極煎大蝦、豉汁蒸鯇魚腩、冬菇釀肉、XO醬茶樹菇豬頸肉、蒜蓉炒白菜。

 

粉葛鯪魚排骨湯﹕夏季例湯之一，落足料啖湯好甜。

冰鎮青瓜西芹﹕青瓜洗淨切條去籽，西芹去筋切條灼熟浸冰水，放入雪櫃搞掂哂，開飯前整碟青芥末醬油，夠哂簡單。

涼拌雲耳﹕呢道涼拌野我又係會落青芥末，再加糖、鹽、白醋、麻油、芝麻。

梅汁蕃茄﹕蕃茄仔500g(去皮)、冰糖80g、梅粉15g、水200g，浸過夜。

豉油雞﹕斬料外賣，可惜落下買開果當休息，呢隻雞一般般。

美極煎大蝦﹕本來係白灼蝦，但老公買錯蝦，唯有就咁煎啦。d蝦唔新鮮，餐飯的敗筆..

豉汁蒸鯇魚腩﹕豆豉醬係自己煮的，陳皮比原食譜分量多，所以好香，一次會煮三瓶放雪櫃，用完再整過。上次蒸桂花鱸，小小姪女一個人幾乎食左半條魚，可惜呢期買過兩次都麻麻地， 所以買鯇魚腩算。

冬菇釀肉﹕又係出貓菜式，超市現成調味肉餅 再加 香菇(浸發切粒)，釀入鮮冬菇，大火蒸8分鐘，碟底的水加生粉煮芡，淋上面就搞掂。查實都成日去果間超市的調味肉餅，水準都算穩定，所以都懶得自己整。
 
XO醬茶樹菇豬頸肉 ﹕海皇XO醬炒菜好惹味，炒好配菜再落肉，肉差唔多熟再落XO醬，兜兩兜再落少少生粉水收汁，碟餸令身D 靚仔好多架。

蒜蓉炒白菜﹕呢期的白菜苗都唔錯，蒜蓉炒最簡單。


查實夜晚要開爐煮的只有幾道菜， 左邊爐頭蒸野(一碟菇兩碟魚)，右邊炒菜煎蝦，所以半個鐘就開得飯。

以前仲會出埋電飯煲焗雞、用焗爐焗蜜汁豬頸肉，小小廚房搞十幾道菜出黎，單係菜單就嚇窒人。但蜜汁豬頸肉屋企人都吃過好幾次，所以唔再整，電飯煲雞阿爸唔鍾意，又驚唔夠肉，所以叫老公斬雞返黎穩陣D。

黑糖麥包

自從試過全人手揉麵後，發覺麵包質感比以前麵機的好好多，就愛上左自己揉麵....奶野添..

睇左好多唔同做法，用麵包機做過好多次，次次出黎的包都唔同，
基本上已經搵到個啱自己的方法，我都係鍾意冷藏中種法多d，
上次一盤20個包的份量太多，果次揉麵要分開兩份先搞得掂，所以今次減少1/4，冇咁攰，可以整密d。

夜晚準備好中種，放入保鮮袋噴少少水，唧走空氣打死結，壓扁放雪櫃 ，雪佢十零個鐘，
個袋漲到好似就爆咁就ok。通常夜晚準備好，第朝或中午就用得。
有次下午整中種，又遲左放雪櫃，結果夜晚就局到要整包， 好彩果陣仲用緊麵包機揉麵，唔怕太嘈啫...哈哈

焗好的包用袋裝好，上次果盤放左三日都仲食得，唔會硬到變石頭，
今次呢盤應該放唔到三日，琴日下午焗好，而家得返五六個....好快清哂



材料﹕ (少鹽少糖少油版，16個，每個60克)
中種麵糰﹕
高筋粉  175g
全麥粉  173g
奶          280g
黑糖      10g
乾酵母  1.5g

主麵糰﹕
全麥粉  75g
高筋粉  75g
奶          60g
黑糖      20g
鹽          6g
蛋          1隻
乾酵母   3g
欖油      40g

天氣太熱，朱古力都熱到溶溶地，同麥包又幾夾喎。

挑戰手工包包 - 攰c左

老公為了減肥化身帶飯族，每天飯盒內就是白烚三寶(烚蛋、雞胸、2~3款菜)，外加幾個麥包，
雖然附近超市賣的麥包味道不錯，比連鎖餅店賣的更好吃，也不會太鹹，可惜最近又加價了， 反正老公要吃麥包，我就自己動手做吧！

網上看了一堆麥包的做法，最後決定做50%的全麥包，用冷藏中種法，做出來的包子尚算可以，

材料﹕一盤麥包，20個，每個60克
中種麵糰﹕高筋粉 230g、全麥粉230g、 奶375g、 砂糖7.5g、 酵母 3/4茶匙。
主麵糰﹕全麥粉100g、 高筋粉100g、 奶 80+50g、砂糖30g、 鹽8g、 蛋1.5隻、 酵母1茶匙、 欖油50g。

預熱焗爐，放中層200度焗7分鐘，轉方向175度焗12分鐘。


ps.  此份量是應老公要求 減糖減油的。另外，奶 80+50g，原材料比例是90g, 但揉麵期間感覺太乾再逐少加奶，最後就變成80+50g，水份含量好高，呵呵~~~

全程人手揉麵，麵包質感比之前用麵包機做的更好，陳年麵包機可以退役了！


另外亦跟着Carol的鮮奶饅頭(老麵)試做， 還好只是賣相差一點，而且不夠綿密，算是沒白費氣力。
8吋蒸籠似乎有點小，準備再買兩個大的，
不鏽鋼蒸鍋會有倒汗水，煲蓋要用布包好，底下還得墊上毛巾吸水，太麻煩了，還是用竹蒸籠比較方便。